Larunbata, azaroak 28. Agoitz, Kultur Etxea. 18:00etan. Prezioa: 5€

Alfredo & Iker Piedrafitak laburbiltzen dute, hein handi batean, 80ko hamarkadaren hasieratik Espainia osoan zabaldu zen Nafarroako rockaren soinua. Alfredok bere gitarrekin, Ikerrek gitarra eta ahotsarekin, ondotik iritsitako taldeei eragin diete biek ala biek, Barricadan eta Dikers taldeetan eginiko lana dela medio. Miss Octubre taldeko kideak ere izan ziren biak, baina gaur egun Iker ekoizle-lanean dabil murgildurik, eta Alfredok eusten dio, bi disko argitaraturik eta Agnesekin batera, gaur egungo zuzeneko onenetakoa duen      Miss Octubreri. Emanaldi honetan eskainiko diguten errepertorioan klasiko ugari daude, Barricadan eta Dikersen jotako beren kantu ospetsuenen bertsioak, eta rock musika ardatz duen familiako elkarbizitzak eman dizkien abesti kutunenetako batzuk.    

Osteguna, abenduak 3. Urantzia, Kultur Etxea. 19:00etan. Prezioa: 5€

Lemon y Tal bikote iruindarra da, Beatriz Tubíak eta Gorka Garcíak osatua, eta duela bost urte sortua En Clave izenarekin. Pop-folk fresko, kaletar eta dirdiragarria darion proiektu hau jostatzeko asmo hutsagatik hasi zen, baina luze gabe fruitua eman zuen, eta gaur-gaurkoz lortu egin dute hasierako gonbidatu gisa jotzea Pastora Soler, Rozalén eta El Kankarekin, Sueños Coleccionables  (2018) estreinako diskoa aurkeztuz. Amaia Romerorekin ere partekatu izan dute mikrofonoa.

Osteguna, abenduak 3. Olazti, Kultur Etxea. 19:00etan. Prezioa: 5€

Baluarteko auditorioan aurkeztu zen, 2018ko azaroaren 18an, El sexto sentido musika-antzezlana. 60 minutuan, genero-indarkeriaren biktima den Sofiaren errealitatea erakusten saiatzen da obra.  

Zuzendaria Lola Rodríguez da, genero-indarkerian espezializaturiko terapeuta. Gidoia idaztean parte hartu du Sandra Iraizozek, genero-indarkeria jasan zuen komunikatzaileak, eta horrek bermatu egiten ditu egiazkotasuna, zehaztasuna eta benetakotasuna. Musika-egokitzapenaz Pedro Planillo musikari eta moldatzailea arduratu da.

Ostirala, abenduak 4. Burlata, Kultur Etxea. 19:00etan. Prezioa: 5€

The Old School laukotearen errepertorioan elkarrekin batera ditugu jazz tradizionalena, boogie woogiea, 50eko hamarkadako Rock & Rolla eta abar. Iruñeko lindy hop giroaren erraietatik sortu zen, eta harekin kolaboratzen dute maiz, kontzertu, jai eta workshopetan. Taldeko kideek hainbat jaialditan jo izan dute, hala nola Donostiako 52 Heineken Jazzaldian, Errioxako Jazz entre Viñedos-en, Iruñeko Auzokale Zikloan, Nafarroako Kultur Zikloan, Iruñeko Spring Lindy Weekend-en, eta hainbat areto eta gunetan: Uharteko Arte Garaikide Zentroa, Iruñeko Zentral, Hell Dorado eta abar.
Proposamen honetarako Espainiako iparraldeko jazz-musikaririk hoberenetako batzuekin arituko dira: Luisa Brito (kontrabaxua), Ramón García Lara (pianoa), Hilario Rodeiro (bateria) eta Iñaki Rodríguez (saxoa, klarinetea, ahotsa).

Ostirala, abenduak 4. Zangoza, Carmen Auditorioa, 19:00etan. Prezioa: 5€

3 en diálogos omenaldi bat da, 80ko eta 90eko hamarkadetan gure bizitzetan agertu ziren eta zenbait irratsaiotan (Radio 3eko “Diálogos 3”  ahantzezina, M80ko “Música Privada”...) entzun genitzakeen Musika Berri guztiei eskainia.
Musika hark berebiziko garrantzia izan zuen entzule eta musikagile belaunaldi oso batentzat. Doinu haietan bestelako bide bat aurkitu zuten, estiloen arteko fusioa eta musika-proposamenen ikuspegi estetiko berria. 

3 en diálogos birsortzea da, ez imitazioa. Joko den kantu bakoitza espresuki moldatu da biolin, biolontxelo eta piano hirukoterako (abesti batzuetan akordeoia ere badago), ezinekoa izanen bailitzateke jatorriz sortu ziren bezala ematea, hain da zabala New Age puruenetik musika elektronikora bitarteko talde-moten eta estiloen aniztasuna.
 

Igandea, abenduak 6. Atarrabia, Kultur Etxea. 19:30etan. Prezioa: 5€

Incorrectas kontzertu eszenikoa da, ahotsez, pianoz, txeloz eta gitarraz emana. Hiru interpretatzaile hauek bertsio originalak egiten dituzte, musikaren historian toki bat duten abeslari eta egile handi eta ezagunen kantuetatik abiatuz. Janis Joplin, Chavela Vargas, Maria Callas, Dolly Parton, Nina Simone...

Ikuskizunaren zatiak elkarrekin lotzen dituzte hainbat testuk. Haiek biribilduko dute bestelako begirada hau, uneren batean “desegokiak” izan ziren XX. eta XXI. mendeetako emakumezko artista horien bizitza eta ibilbide profesionaletako alderdi ez oso ezagun eta arau-hausleei eskainia.  

Asteartea, abenduak 8. Altsasu, Iortia Kultur Gunea, ​​​​​​19:00etan. Prezioa: 5€ 

Zinemaren zirrara agertokira eramana, eta oraingoan, zuzenean emanik jatorrizko soinu-banda. Ikuskizunak dirauen 70 minutuetan etengabeko bidaia egiteko aukera izanen da, zinemaren historiako soinu-banda garrantzitsu eta erakargarrienen bidez. Kalitate handiko ekoizpen paregabe honek publikoaren pasio handietako bi gerturatuko dizkie bertaratzen direnei: zinema eta soinu-bandak, formatu berdingabe eta originalean.